Adiu, planvenguts a l'Infòc.

Al segond de bacheleriat de l'escòla Joan Pelegrí de Barcelona a grelhat un autre occitanofil, se ditz Jòrdi Ortiz de Antonio. Benlèu que sos professors son pas gaire acostumats de recebre de trabalhs de recèrca sus l'occitan, escriches en occitan, defenduts a l'oral en occitan, emai d'una remarcable qualitat. L'occitan, una lenga a la fin'amors es lo titol d'aqueste trabalh que nos ven presentar Jòrdi Ortiz. I balham un còp d'uèlh.

Jòrdi Ortiz a aprés l'occitan als estagis del caòc. Aqueste nuèch d'aqueste dimenge 11 de julh de 2010 podètz assistir encara a l'espectacle Voses parallèlas 8, de l'Èbre al Ròse. S'agís d'un espectacle scenariat e coordinat per Albèrt Mestres e Sofia Fonseca, mèsa en scena d'Albèrt Mestres. Los 8 poètas son 4 e 4 ; 4 de catalans, 4 d'occitans. 8 autors de tria : Isabel Ortega, Roland Pécout, Héctor Moret, Danielle Julien, Josèp Piera, Xavi Gutiérrez, Maite Brazales e Aurélia Lassaca. Veirètz que per un còp es lo quite autor que fa tamben lo comedian. Vos i cal anar. L'espaci es lo Brossa Espai Escènic, al 13 de la carrièra Allada Vermell, de Barcelona. A nou òras. Nos traparem ailà.

Al Mnac, Musèu Nacional d'Art de Catalonha se passa la mòstra Praga, París, Barcelona. Modernetat fotografica de 1918 a 1948. En 1918 la mapa d'Euròpa cambia. I a un país novèl a l'encòp que modèrne que se ditz Checoslovàquia. Praga, la capitala, vendrà tamben 2onda capitala del cubisme, ambe la permision de París, e de la fotografia, e del grafisme, e del cinèma… París es París, encara ; a París i a las agéncias, las galariàs, per París circulan las idèas ; París dardalha sa lutz e importa artistas a bodre coma Man Ray, Brassaï, François Kollar, Germaine Krull, Gisèle Freund, Gerda Taro, Robert Capa… E Barcelona cabussa tanben dins las avantgardas, la mòstra no'n parla de la fotografia artistica e publicitària. A costat de París, veiretz qu'aqueles catalans èran pas tan paisanases qu'aquò ! Paga lo còp, vos o disi. La mòstra serà dubèrta fins lo 12 de setembre.

Prenètz l'agènda. 43 trabalhs son estats presentats als Premis Llanterna Digital 2010, d'ont i a de filmes, de documentaris, de cortmetratges, de reportatges… Pel moment los trabalhs se son passejats per Lhèida, Tàrrega, la Seu d'Urgèlh, Vielha… Lo 3, 6 e 10 d'agost visitan Ostana, dins las valadas d'Itàlia; lo 13, 14 e 15 de setembre visitan Tolosa; 29 de setembre, e un e dos d'octobre, Barcelona; e 18, 19 e 20 de novèmbre Besiers. Aquò comença de far un circuit. La Chambra d'òc que participa a n'aquesta iniciativa nos racomanda qualques trabalhs. Solide, n'anam parlar tornar al setembre.

Monde, clava l'infòc en dubèrt. Mas BONUS TRACK seguís ambe lo cortmetratge "Amor de luènh, amor de..." de Mancino Marie, a partir d'una idèa de Lugan Bedèl. Venètz sus nòstra paja, té! Çai venètz nombroses… e agachatz!