Bon dia. Moment entàs informacions en occitan.

Era lei der occitan, aranés en Aran, a sofrit un grèu damatge colaterau a arraïtz dera senténcia deth Tribunau Constitucionau entar Estatut dAutonomia de Catalonha.

Segons an informat ara redaccion der infòc hònts deth Departament de Politica Lingüistica dera Generalitat de Catalonha e deth Govèrn d'Aran, era lei que regule era oficialitat der occitan en Catalonha deuie de portar-se tath Plen deth Parlament dijaus passat. Totun, e pramor que segons era sentencia, eth catalan non pòt èster lengua preferent, en Partit Popular portèc era lei dimèrcles passat tath Conselh de Gatges Estatutaris, hèt qu'arture de moment eth procès d'aprovacion dera lei que desvolòpe era oficialitat der occitan en Catalonha.

Ath delà, quèm encara en tot demorar era reinterpretacion de quauqui articles dera senténcia deth tribunau espanhòu, que pòden afectar dirèctaments era especifitat dera Val dAran, coma per exemple, es vegueries.

Aguesta setmana, era equipa der infòc qu'a viatjat entath país. Qu'anèrem tà Pau e que visitèrem era Tor deu Borrèu, en centric barri deth Hedars.

Aqueth madeish dia be podérem presenciar-i un concèrt dera banda occitana de Punk, Gojats of Hédas. Es "Gojats" se definissen coma ua banda de punk, sense ahiger-i cap d'aute apellatiu, e ei un des pòqui grops radicaus que i a en Occitània. Simpatizants deth movement de quèrra revolucionària occitana, Libertat!, que pòrten eth sòn compromís pertot eth país en tot tocar en actes politics, culturaus, calandretes, eca.

Tot francament se definissen coma independentistes occitans damb un projècte de país antifascista e anticapitalista. Es sues cançons que parlen deth barri deth Hedars, deth combat ideologic, deth compromís sociau e nacionau.

Quate gojats compausen eth grop: Clément e Bastien ara guitarra, Guigui ath baish e David ara votz. Ua caisha de ritmes que hè eth papèr de bateria, çò que non li trè bric de qualitat ath grop. Amant deth streetpunk e der Oi! be gausaria afirmar que Gojats of Hédas son un grop de fòrça qualitat musicau. Pendent demoram un album sòn, que podem gaudir dera sua musica en web gojatsofhedas.com.

E de Pau que mo n'anam tara Val d'Aran e que passam deth punk entath hip hop. Sin Hip Hop No Hay Crew ei un grop de joens aranesi seguidors dera cultura Hip Hop, un movement culturau sorgit a principis des ans 1970 entre es comunitats afroamericanes e latinoamericanes deth barri Sud deth Bronx, en Naua Yòrk. Se tracte d'un movement culturau damb tot çò que cau: dança, musica, graffiti, mòda e cançon -basicaments- improvisada.

E açò qu'ei tot per aué. Adishatz!