Adiu, planvenguts a l'infòc.

N'an parlat los jornals aquestes jorns, La Vanguardia, vilawèb, semblariá que la literatura occitana comença de ser visisibilizar a Catalonha. I a un interès. Son novetat a las librariás, El Garrell, traduccion del Tibal lo garrèl de Loís Delluc ; Catoia, l'enfarinat, traduccion del libre de Catoia, de Joan Bodon.; La bèstia dau Vacarès, de Josèp D'Arbaud, aquela en version bilenga occitan-catalan ; e Contes de Provença una seleccion dels contes provençaus e leis cascareletas de Josèp Romanilha.
L'infòc anguèt rescontrar Artur Quintana, lo traductor del Catòia de Joan Bodon. Nos contèt l'istòria de sa traduccion. L'escotam.

Disiá Dr. Bardòu dins lo BONUS TRACK de fa dos programas que la màger part dels gigants de la literatura occitana nos an quitat pendent lo sègle 20. Mas aquò vòl pas dire que la produccion de gigants marche mal. I a l'Ives Roqueta, i a Joan Larzac, Robèrt Martí… Mas i a un gigant plan popular, qu'i pensam pas tan sovent qu'aquò, benlèu en pr'amor que son òbra abondosa se tròba d'en pertot e per enluòc, en de publicacions e editorialas de tota sòrta. Vos parli de Roland Pécout, lo poèta viatjaire qu'un còp diguèt avèm decidit d'aver rason, un autor qu'avèm entrevistat aicí, a l'infòc.

Vo'n parlarem lèu, a prepaus d'un espectacle teatral. Uèi vos racomandi un trabalh de Marie-Jeanne Verny, lo memòri de mestria, enrasigament e nomadisme, en francimand. Són 600 paginas dedicadas a l'òbra de Pécout. I es tot, e tanben las coordonadas del tèxtes escampilhats. Publicat per IEO dins la colleccion Textes e documents.

L'autre trabalh, publicat per l'ostau dau país marselhés Laissarem degun, 23 poèmas de Pécout musicats per de monde coma Dupain, Moussu T e lei jovents, Nux vomica, Patrick Vaillant… L'escotam un pauc?

I a una expression que m'agrada en espanhòl: eres más falso que un duro sevillano. Vos recomandi la mòstra La moneda falsa: de l'antiquitat a l'èuro, al Mnac, mòstra consagrada a l'istòria de la falsificacion de la moneda : l'art dels malfaitors de sensibilitat artistica. Se sap que las primièras monedas falsas d'Ibèria son estat fachas a Empúrias., e sabèm pel drech roman e visigotic que l'autoritat i èra rigurosament contra. I anatz trobar 350 pèças, d'ont monèdas, bilhets de banc, cartas bancàrias… Las legalas de produccion massiva acaradas ambe… las de creacion. E tanben los utises de verificacion e de falsificacion. La mòstra s'organiza en 4 periòdes : antic, medieval, epòca modèrna e contemporanèa. Per l'agachar atentivament.

Deman començan los corses intensius de lenga occitana al CAOC, nivèls basics e intermèdi, A2 e B1. Del 28 de junh al 29 de julh, de diluns a dijòus de 5 a 8 oras del sèr. Vos interessa ? Sonarètz lo caòc al 93.284.36.34. Se que non, contactatz a caoc@caoc.cat

E aquò's tot, clavam l'edicion en dubèrt. Dr. Bardòu nos va parlar de las edicions Lètras d'Òc dins lo BONUS TRACK. Los abolics e los inapetents vos podètz conformar d'aquesta pichona edicion tv. Los autres, los elegits, los qu'avètz d'esperit, çai venètz… e agachatz !