Bon dia, moment entàs informacions en occitan.

Que començam er infòc d'aguesta setmana en tot parlar damb eth realizador de cinèma aranés Axel Dettoni. Matricula d'aunor ena sua tèsi de filosofia "La textualidad cinematográfica", Axel Dettoni que guanhèc dues bèques entà estudiar direccion cinematografica en Reiaume Unit. Era sua formacion se completèc mès tard ena Escòla Internacionau de San Antonio de los Baños, en Cuba, e damb diuèrsi mastèrs sus direccion, guidon e documentaus.Que s'inicièc en mon der art damb creacions musicaus e performances, enquia que trobèc en encastre audiovisuau eth lòc a on amassar totes aguestes disciplines. Qu'a amiat a tèrme vidèos musicaus, anóncies de television, vidèo-art e documentaus. Eth sòn darrèr trabalh qu'ei un documentau sus es còlhes de dances dera Val d'Aran, a on tant eth guidon, coma es entrevistes e era estetica son suenhades ath detalh. Era equipa der infòc qu'anèrem tà parlar damb eth, pòc abans que deishèsse Barcelona entà anar-se'n tà trabalhar tà Guatemala.

Damb era creacion dera lista conjunta damb ecologistes e occitanistes, ja auem preséncia dera lengua occitana en lòcs clau dera politica francesa: en Miègjorn Pirenèus, Provença, Auvèrnhe e Aquitània. Er ex-president der Institut d'Estudis Occitans, David Grosclaude, qu'ei ara conselhèr de politica lingüistica entar occitan e eth basc ena region Aquitània e explique entar infòc qué ei aquerò ua conselheria de politica lingüistica en un govèrn regionau der estat francés.

Dijaus passat siguec era Hèsta d'Aran, jornada en que era Val d'Aran commemòre era recuperacion des sues institucions. En Barcelona, era data se celebrèc en tot portar-i hè dues setmanes era exposicion Aran Clavis Regni, era defensa d'un país, ena Sala Ciutat, a on diuendres passat se i debanèc un acte institucionau entà celebrar-i eth dia nacionau deth petit país occitan des Pirenèus. Aguesta exposicion istorica sus era singularitat territoriau dera Val d'Aran e eth sòn caractèr estrategic coma encastre de termièra se pòt visitar enquias dues dera tarde d'aué ena sala Ciutat der Ajuntament de Barcelona

E açò qu'ei tot per aué. Adishatz!