Bon dia, moment entàs informacions en occitan.

Eth 24 de junh passat que moric en Florença Robèrt Lafont: lingüista, istorian, poèta, escrivan, dramaturg e activista culturau e politic occitan.Eth passat dia 16 de març, en tot coïncidir damb era data dera sua neishença, era Generalitat de Catalonha que rendec un aumenatge a Lafont en tot arreconeisher-li era òbra e eth prètzhèt coma sociològ, lingüista e istorian dera literatura occitana.

Er aumenatge a Lafont qu'auec lòc en Auditòri deth Palai dera Generalitat de Catalonha, presidit peth conselhèr de cultura, Joan Manuel Tresserras e damb era participacion deth president Jordi Pujol; eth Sindic d'Aran, Francés Boya; eth president dera Fondacion Occitanocatalana, Joan Amorós; eth vice-president der Institut d'Estudis Catalans, Joan Solà; eth president de Régions et Peuples Solidaires, Gustau Aliròl; e eth president dera Federacion des Ensenhaires de Lengua e Cultura d'òc, Felip Martel.

Pendent er aumenatge que s'i projectèc eth vidèu d'ua entrevista que Lafont auie concedit ar infòc, er escrivan Àlex Susanna que liegec bèri poèmes de Lafont e eth cantautor Claudi Martí que barrèc er acte damb era interpretacion de bères cançons escuelhudes entar eveniment.Era equipa der infòc que i anèrem.

E damb aguest jornalet, era equipa der infòc qu'auem volut hèr tanben eth nòste petit aumenatge a Robèrt Lafont, ua des figures mès importantes dera teoria politica der occitanisme contemporanèu. Adishatz.