Bon dia, moment entàs informacions en occitan.
Es movements de Quèrra Revolucionària Occitana Anaram au Patac, Hartèra! e Combat d'Òc se rehonèren eth passat mès de junh en tot crear ua naua formacion nomentada Libertat!... Tre eth passat dia 25 enquiath dia 28 de hereuèr qu'an estat en Barcelona entà presentar publicaments era naua formacion politica ena Universitat Autonòma de Barcelona, e enes Facultats de Filologia e d'Istòria dera Universitat de Barcelona; ena Casa Palestina e en casal Carme Claramunt de Badalona. Es representants d'aguest nau movement qu'an estat convidadi peth Sindicat d'Estudiants des Païsi Catalans, per Maulets, pera CUP e pera Comunitat Palestiniana de Catalonha. Er infòc les anèc tà trobar ena facultat d'Istòria.
Que començam ua naua seccion a on periodicaments vos presentaram blògs interessants hèti en occitània o en occitan. Aué que vos presentam un blòg creat per dus joeni aranesi damb consciéncia de país: Occitània. Dilhèu per açò eth blòg se ditz Lo País. En aguest blòg que i traparatz articles d'opinion a on es blogaires analizen era realitat deth país: era consciéncia sociau, es mejans de comunicacion, es contenguts en estudi; entrevistes as melhores bandes de ska e punk reivindicatiu en occitan coma per exemple Goulamàs-k e Gojats of Hedàs; e ligams a d'auti sètis deth blogitge e deth mon occitan en generau. Ne parlam damb es blogaires.
Enviatz-mos es adreces des vòsti blòcs damb ua petita descripcion, e se pòt èster, enregistratz-vos damb era vòsta web cam en tot presentar-mos eth blòc, ara adreça deth programa infoc@occitania.org
Eth pròplèu dimarts, tàs set dera tarde, qu'aurà lòc en Palai dera Generalitat de Catalonha, un acte d'omenatge a Robèrt Lafònt. Mo'n parle Jusèp Loís Sans, director deth burèu "Occitan en Catalonha".
E damb açò qu'acabam per aué. Mès informacion sus eth nòste sèti d'internet www.occitania.org/infoc. Adishatz a toti e hètz beròi!
