Bon dia, moment entàs informacions en occitan.
Eth 30 de gèr passat se debanèc era 13au edicion dera Dictada Occitana. Era equipa der infòc que siguec presenta ena que se hège en Barcelona. Era Dictada se debane en Barcelona dempús de hè fòrça ans mercés ath CAOC, entitat qu'enguan organize diuèrsi nivèus de corsi de lengua e cultura occitanes.
Coma activitats complementàries as escolans d'occitan, deluns 15 de gèr, Nicolau Rei-Bèthvéder un harà un corset sus es trèti basics deth dialècte gascon, e eth londeman que diderà ua conferéncia sus era situacion dera nòsta lengua en Gasconha. E es dies 23 e 24 de gèr, Manu Isopet que harà un talhèr d'introduccion as dances occitanes.
Es seguidors deth mèn collèga lenguadocian Manel Zabala, que poderatz auer era oportunitat de conéisher Doctor Bardòu en persona, ena sedença deth CAOC, eth pròplèu dimèrcles dia 17 entàs set dera tarde, en tot hèr ua conferència sus literatura occitana modèrna.
Per çò qu'ei dera rèsta de corsi d'occitan que se debanen en Barcelona, es escolans deth Centre Comarcau Lheidatan que visitèren es corsi d'aranés qu'eth Conselh Generau d'Aran organize en Barcelona. Coma cada an peth dia dera Candelera, es classes d'aranés son un shinhau especiaus. Era polifonia tradicionau de Gasconha qu'a tornat a èster presenta enguan aena ESMUC.
Damb era naua lei de vegueries, ena val d'Aran que i a un bona rambalh, e be n'auratz entenut a parlar. Era equipa der infòc qu'ei en tot premanir entath darrèr programa de hereuèr, un informatiu especiau sus aguest tèma damb es opinions des expèrts e tanben dera gent deth carrèr. Abans, totun, qu'auetz un rendètz-vos damb eth mèn collèga lenguadocian Manel Zabala dimenge que ven. Adishatz a toti, e hètz beròi!
